રૂદ્રાક્ષ । Rudraksha

                           રૂદ્રાક્ષ

       આજે આપણે જાણીશું રૂદ્રાક્ષ વિશે. રૂદ્રાક્ષ ધારણ કરવો એ ખુબ સારી વાત છે. પરંતુ રૂદ્રાક્ષ ધારણ કરતા પહેલા અમુક વાતોનું ધ્યાન રાખવું ખુબ જરૂરી છે. દુ:ખભંજન ભગવાન શિવ કે જેણે સમુદ્રમંથન વખતે નીકળેલું હળાહળ વિષ પીધું હતું અને દેવો અને દૈત્યોનું પણ દુ:ખ હરી લીધું હતું. એવા ભગવાન ભોળાનાથની પુજા કરતી વખતે રૂદ્રાક્ષની માળા પહેરવી જરૂરી છે.

       લિંગપુરાણમાં પણ કહ્યું છે કે

(‘‘ શિવ પૂજાયાં અસ્ય માલા ધારણામાવશ્યકમ્’’)

અર્થાત કે શિવપૂજા વખતે રૂદ્રાક્ષની માળા ધારણ કરવી આવશ્યક છે. હવે આપણે જોઈશું રૂદ્રાક્ષની ઉત્પતિની કથા.

       એકવાર ભગવાન શિવ અને એમના પુત્ર કાર્તિકેય બંને ધાર્મિક ચર્ચાઓ કરી રહ્યા હતાં. એવામાં કાર્તિકેયે પૂછ્યું. ભગવાન શિવજીની આરાધનામાં રૂદ્રાક્ષનું શું મહત્વ છે? એના જવાબમાં ભ્ગવાન શિવજી બોલ્યાં. : જેવી રીતે દેવતાઓમાં વિષ્ણુ, ગ્રહોમાં સુર્ય, નદીઓમાં ગંગા, મુનિઓમાં કશ્યપ, દેવીઓમાં ગૌરી, શ્રેષ્ઠ છે. તેવી રીતે માળાઓમાં રૂદ્રાક્ષ શ્રેષ્ઠ છે. હે કાર્તિકેય ! પુર્વે ત્રિપુર નામનો એક દૈત્ય હતો. એણે બધા દેવોને જીતી લીધા હતાં.

       તેથી તેને મારવા બધા દેવોએ મને પ્રાર્થના કરી. તેથી મેં અઘોર નામના મહાશસ્ત્રનું ચિંતન કર્યું. દીર્ઘ તપ દરમિયાન મેં નેત્રો બંધ રાખ્યા હતાં. પછી જ્યારે મેં નેત્રો ખોલ્યા ત્યારે મારી આંખોમાંથી અશ્રૃબિંદુઓ પડતા હતાં. આ અશ્રુજળના બિંદુઓમાંથી રૂદ્રાક્ષના મોટા વૃક્ષો થયાં. મિત્રો, આપણે ભગવાન શિવને રૂદ્ર તરીકે પણ ઓળખીએ છીએ. તેથી એમ પણ કહી શકાય કે ભગવાન રૂદ્રના આંસુ એટલે રુદ્ર +અક્ષ =રૂદ્રાક્ષ કહી શકાય. આ રૂદ્રાક્ષના મોટા વૃક્ષો થયા તે ૩૮ પ્રકારના હતાં. ભગવાન શિવ કહે છે. એમાં મારા સુર્યરૂપ નેત્રમાંથી બાર પિંગળા રંગના રૂદ્રાક્ષ થયાં. ચંદ્રરૂપ નેત્રમાંથી સોળ ધોળા રંગના રૂદ્રાક્ષ થયાં. અને અગ્નિરૂપ નેત્રમાંથી દસ કૃષ્ણ રંગના રૂદ્રાક્ષ થયાં. અહીં મિત્રો હું તમને યાદ દેવડાવીશ કે ભગવાન શિવને બે નહિં ત્રણ નેત્ર છે. તેથી અહિં ત્રણ આંખોમાંથી અશ્રુ પડવાની વાત ભગવાન શિવજી કાર્તિકેયને કહે છે. હવે જોઈશું રૂદ્રાક્ષના ઝાડ વિશે.

       રૂદ્રાક્ષના ઝાડ મોટા થાય છે. તેના ઝાડના મૂળ જમીનની બહાર દેખાય છે. તેના પાંદડા ગાંગેરી નાગરવેલના પાન જેવા હોય છે. એના ફળમાં જે બીજ હોય છે. એને રૂદ્રાક્ષ કહે છે. રૂદ્રાક્ષના ઝાડ વધુ પડતા નેપાળ, બંગાળ, આસામ અને કોંકણમાં થાય છે. એના પાન સાત-આઠ આંગળ લાંબા અને કિનારીએથી જાડા હોય છે. નવા પાંદડા ઉપર એક પ્રકારની રૂંવાટી હોય છે. જે પાછળથી ખરી જાય છે. એના ફળમાં પાંચ ખાના હોય છે. દરેક ખાનામાં એક-એક નાનું બીજ હોય છે. રૂદ્રાક્ષના પ્રકાર જોઈએ તો કુલ ૨૨ પ્રકારના છે. એમાં રૂદ્રાક્ષ ૧ થી ૧૪ મુખી સુધી ઉપલબ્ધ છે. આ ઉપરાંત ૧પ થી ૨૧ મુખી સુધીના પણ જોવા મળે છે, જ્યારે ૨૨મો પ્રકાર છે. એ ગૌરીશંકર રૂદ્રાક્ષ તરીકે ઓળખાય છે. રૂદ્રાક્ષની સાઈઝ અંદાજે ૧ મીમીથી ૩૫ મીમી કે તેથી પણ મોટી જોવા મળે છે. રૂ્દ્રાક્ષની અન્ય વિશેષતા જોવા જઈએ તો રૂદ્રાક્ષ કાળા, સફેદ, લાલ અને પીળા રંગોમાં જોવા મળે છે. રૂદ્રાક્ષ ખાટુ ઉષ્ણ તથા રૂચિકર છે. એ ઔષધ તરીકે પણ વપરાય છે. રૂદ્રાક્ષ એ વાયુ, કફ, માથામાં થતી પીડા, ભૂત બાધા અને ગ્રહ બાધાનો નાશ કરે છે. એવું મનાય છે. રૂદ્રાક્ષના પ્રકાર મુજબ તેનું મહત્વ જોઈએ. તો ૧ થી ૧૪ મુખી અને ૨૧ મુખી તથા ગૌરીશંકર રૂદ્રાક્ષનુ મહત્વ વધું જોવા મળે છે. હવે જોઈશું રૂદ્રાક્ષનું મહત્વ.

       ૧ મુખી રૂદ્રાક્ષ એ ચંદ્ર આકારનો હોય છે. એ ગોળાકાર ૧ મુખી રૂદ્રાક્ષ અતિ દુર્લભ અને કિંમતી હોય છે. એ શિવ સમાન મનાય છે. એ તમામ પ્રકારની ઈચ્છાઓ પૂર્ણ કરનાર, પાપોથી મુક્તિ આપનાર અને સૌભાગ્યનું પ્રતિક મનાય છે. અત્યારે ૧ મુખી તરીકે ઓળખાતો ચંદ્રાકાર રૂદ્રાક્ષ ખરેખર તો ભદ્રાક્ષનો પ્રકાર છે. જેમાં વચ્ચે કાંણું હોતું નથી. અને તે ફક્ત પૂજા વિધિમાં ઉપયોગી છે.

     ૨ મુખી રૂદ્રાક્ષ એટલે અર્ધનારેશ્વર એટલે શિવશક્તિ સ્વરૂપ મનાય છે. એ સમૃદ્ધિ વધારનાર અને પાપનાશક છે. એકતાનું પ્રતિક અને લગ્ન સંબંધને દ્રઢ બનાવનાર છે. તથા મગજને કાબુ કરનાર અને ચંદ્ર સંબંધી તકલીફો દૂર કરનાર છે.

      ૩ મુખી રૂદ્રાક્ષ એ અગ્નિ સ્વરૂપ અને ધારણ કરનારને તમામ પ્રકારની સમૃદ્ધિ વધારનાર તથા તાવ જેવી બિમારીઓથી મુક્ત કરનાર મનાય છે. મંગળ સંબંધી તકલીફો દૂર કરનાર મનાય છે.

      ૪ મુખી રૂદ્રાક્ષ એ બ્રહ્મા સ્વરૂપ અને ધારણ કરનારને ધર્મ, અર્થ, કામ અને મોક્ષ પ્રદાન કરનાર છે. પાપનાશક, યાદશક્તિ તથા ચાતુર્ય વધારનાર  અને બુદ્ધ સંબંધી તકલીફો દૂર કરનાર મનાય છે.

      ૫ મુખી રૂદ્રાક્ષ એ સર્વસુલ્લભ રૂદ્રાક્ષ કાલાગ્નિ રૂદ્ર એટલે કે શિવસ્વરૂપ અને પાપનાશક છે. ગુરૂ સંબંધી તકલીફો દૂર કરનાર મનાય છે. માળા બનાવવામાં વપરાય છે. પંચમુખી રૂદ્રાક્ષની માળા ધારણ કરનારને તન-મનની શાંતિ તથા આધ્યાત્મિક ઉંચાઈનો અનુભવ કરાવે છે.

       ૬ મુખી રૂદ્રાક્ષ એ સન્મુખનાથ અથવા કાર્તિકેય એટલે કે શિવપુત્ર સ્વરૂપ અને જમણા હાથમાં ધારણ કરનારને બ્રહ્મહત્યા જેવા પાપમાંથી પણ મુક્તિ અપાવનાર મનાય છે. લૉ બી.પી. ના દબાણમા લાભકારી અને શુક્ર સંબંધી તકલીફો દૂર કરનાર મનાય છે.

       ૭ મુખી રૂદ્રાક્ષ એ અનંગ સ્વરૂપ અથવા લક્ષ્મી સ્વરૂપ મનાય છે. અને ધારણ કરનારને તમામ પ્રકારની સમૃદ્ધિ વધારનાર મનાય છે. શનિ સંબંધી તકલીફો દૂર કરનાર મનાય છે.

      ૮ મુખી રૂદ્રાક્ષ એ ગણેશ સ્વરૂપ અને ધારણ કરનારને આઘાત અને અકસ્માતથી રક્ષા કરનાર મનાય છે. રાહુ સંબંધી તકલીફો દૂર કરનાર મનાય છે.

       ૯ મુખી રૂદ્રાક્ષ એ ભૈરવ સ્વરૂપ અને દૈવી સ્વરૂપ મનાય છે. અતિ  લાભકારી અને કેતુ તથા શુક્ર સંબંધી તકલીફો દૂર કરનાર મનાય છે.

      ૧૦ મુખી રૂદ્રાક્ષ અને જનાર્દન એટલે કે વિષ્ણું સ્વરૂપ અને બુદ્ધ સંબંધી તકલીફો દૂર કરનાર મનાય છે.

      ૧૧ મુખી રૂદ્રાક્ષ એ રૂદ્ર સ્વરૂપ અને મંગળ તથા ગુરુ સંબંધી તકલીફો દૂર કરનાર મનાય છે.

       ૧૨ મુખી રૂદ્રાક્ષ એ આદિત્ય એટલે સુર્ય સ્વરૂપ અને સુર્ય સંબંધી તકલીફો દૂર કરનાર મનાય છે. ધારણ કરનારને શત્રુઓથી રક્ષણ અને હિંમત પ્રદાન કરનાર તથા હાઈ બી.પી. હ્રદય, લોહિ સંબંધી તકલીફોમાં રાહત આપનાર મનાય છે.

       ૧૩ મુખી રૂદ્રાક્ષ એ કાર્તિકેય એેટલે કે શિવપુત્ર સ્વરૂપ અને ધારણ કરનારને મંગળ સંબંધી તકલીફોથી રક્ષણ કરનાર મનાય છે.

        ૧૪ મુખી રૂદ્રાક્ષ એ શિવ સ્વરૂપ અને હનુમાન સ્વરૂપ એક મુખી પછી અતિ મહત્વ ધરાવનાર છે. શનિ સંબંધી તકલીફો અને સાડાસાતીની અસરમાં ખુબ જ લાભદાયક છે.

         મિત્રો, આપણે જોયું ૧ થી ૧૪ મુખી સુધીના રૂદ્રાક્ષનું મહત્વ. હવે આગળ આપણે જાણીશું ૨૧ મુખી રૂદ્રાક્ષનું મહત્વ અને ગૌરીશંકર રૂદ્રાક્ષનું પણ મહત્વ જાણીશું. પણ અહિં મિત્રો, હું તમને જણાવી દઉં છુ કે મને ૧૫ મુખીથી ૨૦ મુખી સુધીના જે રૂદ્રાક્ષ છે. તેના મહત્વની માહિતિ મને મળી નથી. તેને કારણે હુ તમને અત્યારે જણાવી શકતો નથી. પણ ૧૫ થી ૨૧ મુખી સુધીના રૂદ્રાક્ષ અતિ કીંમતી અને અલભ્ય મનાય છે.

       હવે આપણે જાણીશું ૨૧ મુખી રૂદ્રાક્ષનું મહત્વ. ૨૧ મુખી રૂદ્રાક્ષ એ કુબેર સ્વરૂપ એટલે કે ધનસંપત્તિના દેવ સ્વરૂપ અને ધારણ કરનારને અદ્ભુત આર્થિક લાભ કરાવનાર મનાય છે.

      હવે જાણીશું ૨૨ મો પ્રકાર જેને આપણે ગૌરીશંકર રૂદ્રાક્ષ તરીકે ઓળખીએ છીએ.

       આ ગૌરીશંકર રૂદ્રાક્ષ એ કુદરતી રીતે જોડાયેલા બે રૂદ્રાક્ષ જે શિવશક્તિનું પ્રતિક છે. એ પ્રેમ, આકર્ષણ, શાંતિ, સંવાદ તથા પતિ-પત્નિ અને પ્રેમીજનો વચ્ચે લાગણી વધારનારો છે.

       આપણે જાણ્યું રૂદ્રાક્ષના પ્રકાર તથા તેનું મહત્વ. આજે હું તમને રૂદ્રાક્ષ વિશેની તમામ પ્રકારની માહિતિ આપવાની કોશિશ કરી રહ્યો છું. જેમાં આપણે જોઈશું કે રાશિ મુજબ ક્યો રૂ્દ્રાક્ષ પહેરવો અને કોણ કોણ આ રૂદ્રાક્ષ ધારણ કરી શકે તેમજ રૂદ્રાક્ષ ધારણ કરતી વખતે ક્યો મંત્ર બોલવો જોઈએ. અને રૂદ્રાક્ષ જપનો મંત્ર ક્યો છે. તે પણ આપણે વિગતવાર જોઈશું.

       તો સૌથી પહેલા અપણે જાણીશું રૂદ્રાક્ષ ધારણ કરતી વખતે બોલવાનો મંત્ર અને તેનું મહાત્મ્ય પણ, સાથે જોતા જઈશું કે

      ૧ મુખી રૂદ્રાક્ષનો મંત્ર છે. (ૐ વહી નમ: I )

   તેનું મહત્વ છે કે પ્રત્યક્ષ શિવ સ્વરૂપ છે. સંસાર સુખ અને મુક્તિ આપે છે. તેના દર્શન માત્રથી જ પાપ નાશ પામે છે. જ્યાં આ રૂદ્રાક્ષની પુજા થાય છે. ત્યાં લક્ષ્મી વાસ કરે છે. સર્વ ઉપદ્રવો નાશ પામે છે.  અને સર્વ કામનાઓ પુરી થાય છે.

       ૨ મુખી રૂદ્રાક્ષનો મંત્ર છે. (ૐ હું નમ: I)

   આ રૂદ્રાક્ષને તો દેવના પણ દેવરૂપ સમજવો. તે સર્વ ઈચ્છિત ફળને આપે છે. વિશેષ કરી ગૌવધના પાપને પણ તે રૂદ્રાક્ષ નાશ કરે છે.

       ૩ મુખી રૂદ્રાક્ષનો મંત્ર છે. (ૐ ક્લીં નમ: I)

   તે સર્વસિદ્ધિ આપે છે. તેના પ્રભાવથી સર્વ વિદ્યા મળે છે.

       ૪ મુખી રૂદ્રાક્ષનો મંત્ર છે. (ૐ વહી નમ: I)

   તે પ્રત્યક્ષ બ્રહ્મારૂપ જાણવો તે મનુષ્ય હત્યાનું નિવારણ કરે છે. તેના દર્શન કરવાથી કે સ્પર્શ કરવાથી ચારે વર્ણને ઉત્તમ ફળ આપે છે.

       ૫ મુખી રૂદ્રાક્ષનો મંત્ર છે. (ૐ વહી નમ: I)

   તે પ્રત્યક્ષ રૂદ્ર એટલે કે શંકરરૂપ જાણવો. તેનું કાલાદિનામ છે. તે મુક્તિ તથા સર્વકામનાઓની સિદ્ધિ કરનાર છે. અગમ્ય ગમનજન્ય તથા અભક્ષ્ય ભક્ષ્યજન્ય જેવા મહાપાપને પણ તે પંચવક્રવાળો રૂદ્રાક્ષ નાશ કરે છે.

       ૬ મુખી રૂદ્રાક્ષનો મંત્ર છે. (ૐ વહી હું નમ: I)

  આ રૂદ્રાક્ષ કાર્તિક સ્વામિરૂપ જાણવો. જમણે હાથે ધારણ કરવાથી બ્રહ્મહત્યા વગેરે પાપથી મુક્ત થવાય છે.

       સાતમુખી રૂદ્રાક્ષનો મંત્ર છે. (ૐ હું નમ: I)

  તે રૂદ્રાક્ષનું નામ અનંગ છે. તેવો આ રૂદ્રાક્ષ ધારણ કરવાથી મહાદરિદ્ર પણ પુષ્કળ ધનવાન બને છે.

     ૮ મુખી રૂદ્રાક્ષનો મંત્ર છે. (ૐ હું નમ: I)

  આ રૂદ્રાક્ષ વસુરૂપ અને ભૈરવસ્વરૂપ છે. તેને ધારણ કરવાથી મનુષ્ય સંપુર્ણ આયુષ્યવાન બને છે. અને મૃત્યુ થયા પછી શિવરૂપ બને છે.

      ૯ મુખી રૂદ્રાક્ષનો મંત્ર છે. (ૐ વહી હું નમ: I)

  આ રૂદ્રાક્ષ ભૈરવ અને કપિલમુનિરૂપ જાણવો. એ રૂદ્રાક્ષ અધિષ્ઠાત્રિ નવરૂપ ધારણ કરનારી દુર્ગાદેવીરૂપ છે. જે મનુષ્ય ભક્તિપુર્વક રૂદ્રાક્ષ ડાબે હાથે ધારણ કરે છે. તે સર્વ સામર્થ્યવાન શિવ સરીખો બને એમાં કશો સંસય  ન સમજવો.

      ૧૦ મુખી રૂદ્રાક્ષનો મંત્ર છે. (ૐ વહી હું નમ: I)

  તે પ્રત્યક્ષ વિષ્ણુરૂપ જાણવો તેને ધારણ કરવાથી પણ સર્વકામના પુરી થાય છે.

       ૧૧ મુખી રૂદ્રાક્ષનો મંત્ર છે. (ૐ વહી હું નમ: I)

  આ રૂદ્રાક્ષ પ્રત્યક્ષ રૂદ્રરૂપ જ સમજવો. તેને ધારણ કરવાથી સર્વસ્થળે જય મળે છે.

       ૧૨ મુખી રૂદ્રાક્ષનો મંત્ર છે. (ૐ ક્રાં ક્ષોં રૌં નમ: I)

  આ રૂદ્રાક્ષને ચોટલીમાં ધારણ કરવાથી તે ધારણ કરનાર બાર સુર્ય સમાન તેજસ્વી અને સુર્યરૂપ જ બને છે.

       ૧૩ મુખી રૂદ્રાક્ષનો મંત્ર છે. (ૐ વહી નમ: I)

   આ રૂદ્રાક્ષ વિશ્વદેવરૂપ છે. તે ધારણ કરવાથી સર્વકામના પુરી થાય અને માંગલિક સદ્દભાગ્યનો ઉદય થાય છે.

        ૧૪ મુખી રૂદ્રાક્ષનો મંત્ર છે. (ૐ નમ: I)

   તે શિવ સ્વરૂપ હોઈ તેને મસ્તક પર ધારણ કરવાથી સર્વપાપનો નાશ થાય છે.

       મિત્રો, આ આપણે જોયું. ૧ થી ૧૪ મુખી રૂદ્રાક્ષ  ધારણ કરવાના મંત્રો.

   હવે આપણે જાણીશું રૂદ્રાક્ષની માળા વિશે. રૂદ્રાક્ષની અંદર ૧૫, ૨૫, ૨૭, ૩૦, ૫૪, ૧૦૧, અને ૧૦૮ મણકાની માળા આવે છે. ૧૫ મણકાની માળા શુદ્ધ કર્મ માટે વપરાય છે. ૨૫ મણકાંની માળા મોક્ષ આપે છે. ૨૭ મણકાંની માળા ચોર્યાસી લક્ષના ફેરામાંથી મુક્તિ માટે ૩૦ મણકાની માળા ધાર્મિક ભાવના તરફ વળવા માટે ૫૪ મણકાની માળા ધારેલા કાર્યને સિદ્ધિ આપે છે. ૧૦૧ મણકાની માળા પવિત્ર ભાવના અને બુદ્ધિ આપે છે. ૧૦૮ મણકાની માળા જીવનમાં સુખ-સામર્થ્ય અને સમૃદ્ધિ આપે છે.

         હવે આપણે આગળ જાણીશુ કે આ માળાઓ કઈ જગ્યાએ ધારણ કરવી જોઈએ.

(સમસ્ત સિદ્ધયૈ રુદ્રાક્ષા મણયો ધનદા મતા: I)

        પવિત્ર રૂદ્રાક્ષના દાણા સર્વપ્રકારની સિદ્ધિ અને લક્ષ્મી આપનારા ગણાય છે. ખાસ સફેદ દોરાનો ઉપયોગ કરવાથી જીવનમાં સુખ-શાંતિ, ધન અને ઉન્નતિ પ્રાપ્ત થાય છે. ૨૬ રૂદ્રાક્ષની માળા શિર પર, ૫૦ તથા ૨૭ દાણાની રૂદ્રાક્ષમાળા ધારણ કરવાથી ને જપ કરવાથી અનંત ફળ પ્રાપ્ત થાય છે. ૧૦૮ રૂદ્રાક્ષ ધારણ કરનારને અશ્વમેઘ યજ્ઞનું ફળ પ્રાપ્ત થાય છે. તે પોતાના ૨૧ કુળોને તારીને પોતે કૈલાશમાં જાય છે.

હવે આપણે જાણીશું ૧ થી ૧૪ મુખી રૂદ્રાક્ષનો જપમંત્ર

૧ મુખી રૂદ્રાક્ષનો મંત્ર છે. (ૐ હં ઔં એં ઓમ્ I)

૨ મુખી રૂદ્રાક્ષનો જપમંત્ર છે. (ૐ ક્ષીં હીં ક્ષૌં બ્રીં I)

૩ મુખી રૂદ્રાક્ષનો જપમંત્ર છે. (ૐ રં ઈં હ્રીં હૂં ઓં I)

૪ મુખી રૂદ્રાક્ષનો જપમંત્ર છે. (ૐ વાં ક્રાં તાં હાં ઈં I)

૫ મુખી રૂદ્રાક્ષનો જપમંત્ર છે. (ૐ હાં આં ક્ષ્મ્યૌં સ્વાહા I)

૬ મુખી રૂદ્રાક્ષનો જપમંત્ર છે. (ૐ હ્રીં શ્રીં ક્લીં સૌં હેં I)

૭ મુખી રૂદ્રાક્ષનો જપમંત્ર છે. (ૐ હં ક્રીં હ્રીં સૌં I)

૮ મુખી રૂદ્રાક્ષનો જપમંત્ર છે. (ૐ હ્રાં ગ્રીં લં આં શ્રીં I)

૯ મુખી રૂદ્રાક્ષનો જપમંત્ર છે. (ૐ હ્રીં વં યં રં લં I)

૧૦ મુખી રૂદ્રાક્ષનો જપમંત્ર છે. (ૐ  હ્રીં ક્લીં વ્રીં ૐ I)

૧૧ મુખી રૂદ્રાક્ષનો જપમંત્ર છે. (ૐ રું ભૂં યૂં ૐ I)

૧૨ મુખી રૂદ્રાક્ષનો જપમંત્ર છે. (ૐ હ્રીં ક્ષૌં ધૃણિ: શ્રીં I)

૧૩ મુખી રૂદ્રાક્ષનો જપમંત્ર છે. (ૐ ઈં યાં આપ ઓં I)

જ્યારે ૧૪ મુખી રૂદ્રાક્ષનો જપમંત્ર છે. (ૐ ઔં હસ્ફ્રે ખબ્ફૈં હસ્ત્રોં હસબ્ફૈં I)

મિત્રો, આપણે જાણી ૧ થી ૧૪ મુખી રૂદ્રાક્ષના જપમંત્ર વિશેની વાત.

     હવે આપણે જાણીશું કઈ રાશિવાળાને ક્યો રૂદ્રાક્ષ ધારણ કરી શકે છે. તેના વિશેની માહિતિ. તો આપણે જાણીએ રાશિવાર રૂદ્રાક્ષની માહિતિ.

       પેલી રાશિ છે. મેષ રાશિ. મેષ રાશિવાળા વ્યક્તિ ત્રિમુખી રૂદ્રાક્ષને છોડી કોઈપણ મુખવાળા રૂદ્રાક્ષને ધારણ કરી શકે છે.

      બીજી રાશિ આવે છે. વૃષભ રાશિ. આ રાશિવાળા વ્યક્તિ કોઈપણ મુખવાળા રૂદ્રાક્ષને ધારણ કરી શકે છે.

      ત્રીજી રાશિ આવે છે. મિથુન રાશિ. ૫ મુખી છોડીને આ રાશિવાળા વ્યક્તિ કોઈ પણ રૂદ્રાક્ષ ધારણ કરી શકે છે.

       ચોથી રાશી આવે છે. કર્ક રાશિ. કર્ક રાશિવાળા વ્યક્તિને લગભગ બધા રૂદ્રાક્ષ ઉત્તમ જ છે.

      પાંચમી રાશિ છે. સિંહ રાશિ . આ સિંહ રાશિ વાળાને માટે કેવળ ત્રિમુખી રૂદ્રાક્ષ વર્જિત છે. બાકી અન્ય રૂદ્રાક્ષ ધારણ કરી શકે છે.

      છઠ્ઠી રાશિ છે. કન્યા રાશિ. કન્યા રાશિવાળા વ્યક્તિ અમુક સંખ્યાના મુખવાળા રૂદ્રાક્ષ ધારણ કરી શકે છે. તેને ૬ મુખી વધુ લાભકારી છે.

      સાતમી રાશિ છે. તુલા રાશિ. આ તુલા રાશિવાળા વ્યક્તિને કોઈપણ મુખવાળા રૂદ્રાક્ષ ધારણ કરવા વર્જીત નથી

      આઠમી રાશિ છે. વૃશ્ચિક રાશિ એને માટે બધા રૂદ્રાક્ષોમાં માત્ર ત્રિમુખી વર્જીત છે.

      નવમી રાશિ છે. ધનુ રાશિ. ધનુ રાશિ કોઈપણ મુખવાળા રૂદ્રાક્ષ ધારણ કરી શકે છે. પણ ૧ મુખી સૌથી વધારે લાભદાયક છે.

      દશમી રાશિ છે. મકર રાશિ. મકર રાશિવાળાને માટે માત્ર ૫મુખી છોડીને બાકીના ઉત્તમ રહે છે.

      જ્યારે અગિયારમી રાશિ છે. કુંભ રાશિ. કુંભ રાશિવાળા કોઇપણ મુખવાળા રૂદ્રાક્ષ ધારણ કરી શકે છે. જો એ ૭ મુખી રૂદ્રાક્ષ ધારણ કરે તો વિશેષ લાભપ્રદ થશે. ૭ મુખી રૂદ્રાક્ષ કામરૂપ થાય છે. દરિદ્રનાશ સમુદ્ધિ પ્રાપ્તિ અને રોગમુક્તિ માટે તે ધારણ કરવા જોઈએ.

        છેલ્લી અને બારમી રાશિ છે. મીન રાશિ. રૂદ્રાક્ષના મામલામાં આ રાશિવાળા વ્યક્તિ વિશેષ ભાગ્યશાળી હોય છે. તેને એકવાર જે સારા મુખવાળો રૂદ્રાક્ષ લાભ આપે છે. તે બીજી બાજુએ ૧મુખી રૂદ્રાક્ષ વિશેષ શુભ ફળ આપે છે.

       આપણે જોયું કે રાશિવાર ક્યો રૂદ્રાક્ષ ધારણ કરવો તે. અને આ સિવાય પણ શિવપુરાણમાં કહ્યું છે કે સ્ત્રિઓને રૂદ્રાક્ષ, રૂદ્રાક્ષની માળા ધારણ કરવાની સંમતિ આપવામાં આવી છે. એટલું જ નહિં પરંતુ કોઈપણ જાતિ, જ્ઞાતિના વ્યક્તિ રૂદ્રાક્ષ કે રૂદ્રાક્ષની માળા ધારણ કરી શકે છે. રૂદ્રાક્ષને ધારણ કરવા માટેનો શ્રેષ્ઠ સમય છે. શ્રાવણ મહિનો. અને પુરા શ્રાવણ માસ દરમિયાન અને અમાવસ્યાના દિને રૂદ્રાક્ષ ધારણ કરવાથી યાચકને ઈષ્ટસિદ્ધિ પ્રાપ્ત થાય છે. અને મિત્રો, આપણે જાણ્યું તે મુજબ રૂદ્રાક્ષ ધારણ કરતા પહેલા જે રૂદ્રાક્ષ ધારણ કરો તેનો મંત્ર અવશ્ય બોલવો અને તે મંત્રથી જ રૂદ્રાક્ષ ધારણ કરવો.

       જે મનુષ્ય પૃથ્વીમાં મંત્ર વિના રૂદ્રાક્ષ ધારણ કરે છે. તે ૧૪ ઈન્દ્રો બદલાય ત્યાં સુધી ઘોર નરકમાં રહે છે.

      રૂદ્રાક્ષની માળા જોઈને ભુત, પ્રેત, પિશાચ, ડાકણ, શાકિની અને અન્ય કોઈ કૃત્રિમ તથા કુદરતી દ્રોહ કરનાર હોય તે તમામ ભયભીત થઈ દૂર ખસી જાય છે.

      મિત્રો, આજે મને જેટલી પણ રૂદ્રાક્ષ વિશેની માહિતી મળી તે મુજબ તમારી સમક્ષ રજુ કરવાની કોશિશ કરી છે. અને આની અંદર કોઈપણ રૂદ્રાક્ષની માહિતિ મારાથી કહેવાની રહી ગઈ હોય તો આપ મને કોમેન્ટ કરીને અવશ્ય જણાવશો. અને મારૂં ધ્યાન દોરજો. જેથી હું બીજી વખત રૂદ્રાક્ષ વિશે માહિતિ રજુ કરુ ત્યારે તમારી સજેસન્સ સામિલ કરી શકું અને તે મારા માટે મોટિવેશન બની રહેશે.

     મિત્રો તમને આ લેખ કેવો લાગ્યો? તે અમને કોમેન્ટ કરી જણાવશો. સાથે બીજી કોઈ અન્ય ધાર્મિક માહિતી જોઈતી હોય તે પણ કોમેન્ટ કરશો.

                                    હર હર મહાદેવ !

Leave a Comment

gu Gujarati
X